Nikon Imaging | Ísland | Europe

17-01-2019

NIKON KYNNIR NÝJAR COOLPIX-MYNDAVÉLAR MEÐ OFURAÐDRÆTTI TIL AÐ KANNA HEIMINN

Amsterdam, Hollandi, 17. janúar 2019: Nikon kynnir tvær nýjar COOLPIX-myndavélar með ofuraðdrætti, búnar fjölmörgum öflugum eiginleikum og NIKKOR-linsubúnaði til að taka afburðamyndir. Hvort sem teknar eru myndir af útsýni úr fjarlægð eða borgarmyndir skila þessar léttu, einföldu og fyrirferðarlitlu myndavélar skörpum myndum, bæði í gleiðhornsmyndatöku og ofuraðdrætti – jafnvel í lítilli birtu.

COOLPIX A1000 er búin 35x optískum aðdrætti, nýjum, innbyggðum rafrænum leitara og upptöku með RAW-mynd. Þessi myndavél er frábær ferðafélagi og gerir notendum kleift að skipta úr gleiðu sjónarhorni í mikinn aðdrátt án fyrirhafnar. Hún tekur upp 4K-kvikmyndir og er með hallanlegum snertiskjá til að auðveldara sé að byggja upp myndir frá óvenjulegu sjónarhorni.

COOLPIX B600 er myndavél á millistigi sem búin er 60x optískum aðdrætti, stórum skjá og traustu gripi. Hvort sem taka á myndir í fjölskylduferð í almenningsgarðinn eða borgarferð er þetta frábær alhliða myndavél. Hún tekur upp myndskeið í fullri háskerpu og víðómi. Fjöldi skapandi stillinga í myndavélinni auðveldar notendum að ljá myndum eða kvikmyndum listrænan blæ.

Ines Bernardes, framleiðslustjóri hjá Nikon Europe, hefur þetta að segja: „Báðar þessar myndavélar eru frábærir kostir fyrir notendur sem vilja gefa ímyndunaraflinu lausan tauminn. Aðdráttarsviðið frá gleiðhorni yfir í mikinn aðdrátt veitir notendum frelsi til að taka myndir af næstum hvaða myndefni sem er. Baklýsta 16 megapixla CMOS-myndflagan frá Nikon og titringsjöfnunin hjálpa til við að skila framúrskarandi árangri þegar birtan er takmörkuð. Með SnapBridge er síðan auðvelt að deila bestu myndunum, eða nota snjalltæki til að fjarstýra myndatöku.“¹

Helstu eiginleikar COOLPIX A1000

NIKKOR-linsa með 35x optískum aðdrætti. Brennivídd 24–840 mm.² Hægt að auka í u.þ.b. 1680 mm með Dynamic Fine Zoom.³
4K-kvikmyndir. Tekur upp stórfenglegar 4K/UHD 30p-kvikmyndir eða í fullri háskerpu á allt að 60 ramma hraða á sekúndu.
Stór rafrænn leitari. 1.166.000 punkta rafrænn leitari með mikilli skerpu veitir fulla yfirsýn.
Hallanlegur snertiskjár. Björtum þriggja tommu og 1.036.000 punkta LCD-háskerpuskjánum er hægt að halla í nánast hvaða átt sem er.
Þýð og þægileg aðdráttarstýring. Aðdráttarrofi á hlið og bakfærsluhnappur aðdráttar auðvelda aðdráttarstillingu hratt og hindrunarlaust.
RAW-stuðningur. Notendur geta vistað óþjappaðar myndaskrár og flutt þær út í myndvinnsluforrit.

Helstu eiginleikar COOLPIX B600

NIKKOR-linsa með 60x optískum aðdrætti. Brennivídd 24–1440 mm.² Hægt að auka í u.þ.b. 2880 mm með Dynamic Fine Zoom.³
HD-kvikmyndir í fullri háskerpu. Aðeins þarf að ýta á sérstaka kvikmyndahnappinn til að taka upp í fullri háskerpu (1080p/30p) og víðóma hljómi.
Stór skjár. Þriggja tommu, 921.000 punkta LCD-skjár með stillanlegri birtu. Meðhöndlaður með glampavörn.
Hraður sjálfvirkur fókus. AF-greining á myndefni tryggir skjótan fókus, jafnvel við litla birtu.
Listin er leikur. Skapandi stillingar fyrir myndir og kvikmyndir. Með makróstillingu er hægt að ná frábærum myndum þótt myndefnið sé smátt.


¹ Áður en hægt er að nota SnapBridge með þessari myndavél þarf að setja SnapBridge-forritið frá Nikon upp í samhæfu snjalltæki.
² Jafngildir 35 mm.
³ Stækkun á Dynamic Fine Zoom er reiknuð út frá minnsta aðdrætti optíska aðdráttarins.