Nikon Imaging | Ísland | Europe

12-01-2018

Joel Marklund, sendiherra Nikon, skrásetur líf Sama í Svíþjóð

Frumbyggjar Svíþjóðar, samfélag sem á sér fáa málsvara, eru í forgrunni í þessari kröftugu myndaröð

Amsterdam, Hollandi, 12. janúar 2018 – Evrópusendiherra Nikon, Joel Marklund, hefur unnið einstakt verkefni sem lýsir samfélagi Sama í Svíþjóð – málefni sem honum er kært. Með D5 og NIKKOR-linsunum sínum hefur Joel sett sér það markmið að veita innsýn í daglegt líf í samfélagi Sama með myndaröð sem kollvarpar staðalímyndunum sem gjarnan tengjast þessu samfélagi.

Samar búa á landsvæði sem kallast Samaland (Sápmi), og nær yfir norðurhluta Noregs, Svíþjóðar og Finnlands sem og Kólaskagann í Rússlandi. Þótt landsvæði Sama sé skipt niður með formlegum landamærum þessara fjögurra ríkja eru Samarnir samt sem áður einn hópur sem á sér sameiginlega menningu, tungumál og sjálfsmynd. Joel vildi miðla áfram hinu sanna eðli Sama, kafa undir yfirborðið og sýna fram á að þjóðflokkurinn er annað og meira en „hreindýrasmalar sem búa í fjöllunum“.

„Bestu fréttirnar gerast ekki alltaf á mest framandi eða afskekktustu stöðum veraldar,“ segir Marklund.„Ég var staðráðinn í að fjalla um eitthvað sem ég tryði á og sem skipti mig virkilega miklu máli. Saga Samanna hefur ekki farið hátt. Þar sem ég ólst upp í Boden, nálægt nokkrum byggðarlögum Sama, vann ég þetta verkefni bæði af innri þörf og auðmýkt.“

Nikon D5, AF-S NIKKOR 35mm f/1.4G

Nikon D5, AF-S NIKKOR 35mm f/1.4G

Til að geta skrásett líf Sama í Svíþjóð í dag dvaldi Joel í sex vikur í samfélagi þeirra og tók virkan þátt í lífi tólf ólíkra einstaklinga – allt frá söngvurum og dönsurum til trommugerðarmanna og skólafólks – í því skyni að segja sögu hvers og eins. Við þetta verkefni notaði hann D5-myndavél ásamt AF-S NIKKOR 35mm f/1.4G, AF-S NIKKOR 50mm f/1.4G og AF-S NIKKOR 70-200mm f/2.8G ED VR II.

Ljósmyndir Joels sýna Sama bæði í hefðbundnu umhverfi og þjóðbúningnum „gákti“, en einnig í daglegu starfi, þar sem tengslin við aðra hluta þjóðfélagsins eru skýrari. Þessar menningarlegu andstæður eru gegnumgangandi í myndaröðinni.

Sem dæmi má nefna að eftir að hafa tekið myndir af Mariku Renhuvud í nokkra daga þar sem hún var að aðstoða fjölskyldu sína við að slátra hreindýrum komst Joel að því að hún stundaði nám við Ballettakademíuna í Stokkhólmi.

Maxida Marak ólst upp í Stokkhólmi, bjó síðan í hefðbundnu samfélagi Sama en hefur nú snúið til baka til borgarinnar og nýtur þar velgengni sem söngkona. Í annarri myndaröð er Merethe Kuhmunen fylgt eftir, en hún er nemandi sem vinnur að því að bæta réttindi LGBT-samfélagsins í Samalandi.

Hægt er að sjá allar sögurnar á þessari vefsíðu.

„Ég varð að leyfa þessum ólíku einstaklingum að njóta sín sem best, því var réttur tækjabúnaður algert skilyrði,“ segir Marklund. AF-S NIKKOR 35mm f/1.4G og AF-S NIKKOR 70-200mm f/2.8G ED VR II eru fullkomnar fyrir heimildaljósmyndun, meðan AF-S NIKKOR 50mm f/1.4G er frábær fyrir myndatökur þar sem birta er lítil.

„Þetta verkefni hefur verið mér mjög lærdómsríkt – ekki eingöngu sem fréttaljósmyndara heldur sem Svía. Að geta tekið myndir í heimalandi mínu og fá að kynnast samfélagi Samanna hefur breytt lífi mínu og ég er mjög þakklátur Nikon fyrir að gefa mér tækifæri til þess.“

Evrópusendiherrar Nikon

Evrópusendiherrar Nikon eru hæfileika- og áhrifaríkir listamenn í myndgerð sem nota nýjustu tækni greinarinnar og skilning á félagslegum stefnum til að sýna núverandi tímaskeið. Nikon skoraði á Joel að gera draumaljósmyndaverkefnið sitt að veruleika og byggja á þeirri alþjóðlegu viðurkenningu sem hann hefur hlotið sem íþrótta- og fréttaljósmyndari.

Frekari upplýsingar um verkefni Joels fást á sérverkefnissíðunni hans.

Búnaðurinn

Joel notaði eftirfarandi búnað í verkefninu:

• AF-S NIKKOR 35mm f/1.4G 
• AF-S NIKKOR 50mm f/1.4G
• AF-S NIKKOR 70-200mm f/2.8G ED VR II    
• D5 

Um Joel

Joel Marklund er nafntogaður ljósmyndari sem sérhæfir sig í íþróttamyndum. Hann býr í Stokkhólmi og er í augnablikinu aðalljósmyndari hjá fremstu íþróttaljósmyndaumboðsskrifstofu Svíþjóðar, Bildbyrån. Hann hefur unnið í yfir 45 löndum og fjallað um fjölda hnattrænna viðburða, þar með talið fimm Ólympíuleika. Hann hefur gefið út verk sín um allan heim og unnið fjölmörg verðlaun fyrir myndir sínar. Þar með talið eru Picture of the Year International, Besta fréttaljósmyndin hjá NPPA og sænsku verðlaunin Mynd ársins.

Allar myndir eru í eigu © Joel Marklund.

Finna má frekari upplýsingar um Evrópusendiherra Nikon á www.europe-nikon.com